SHlemenko natijani qayta ko'rib chiqish bo'yicha apellyaciya berdi

Kechaning markaziy jangida rossiyalik Aleksandr SHlemenko asli kelib chiqishi armanistonlik bo'lgan, lekin Gollandiya bayrog'i ostida oktagonga chiqayotgan Gegard Musasiga ochkolar hisobiga ko'ra mag'lub bo'lgandi.

Hakamlarning qarori nafaqat SHlemenko va uning jamoasi, balki muxlislarga ham maqul kelmagandi. Zal to'la muxlislar Musasining g'olib chiqqanligini xushtakbozlik bilan kutib olishdi. Aleksandrning o'zi qaror yuzasidan “protest” berdi.

– Men hakamlarning qarorlariga umuman qo'shilmayman. Ha, tan olaman, men birinchi raundni boy berdim. Lekin ikkinchi va uchinchi raundlarni raqibdan yaqqol ustunlikka erishdim. Hakamlar meni o'z qarorlari bilan “ko'mib” qo'yishdi. Biz qaror yuzasidan apellyaciya beramiz. Ammo katta ehtimol bilan ular o'z qarorlarini o'zgartirishmasa kerak, – dedi SHlemenko.

Etiborlisi, har ikki sportchi ham jangdan so'ng to'g'ri kasalxonaga ravona bo'lgan. SHlemenko jang davomida qo'lini sindirib olgandi. Musasi esa o'tkazib yuborilgan zarbalardan so'ng shifokor ko'rigiga muhtoj bo'lib qolgan.