Sinner "Rolan Garros" 1/4 finalida Dimitrovni taslim etdi

Erkaklar o'rtasidagi bahslarda yarim finalchilar aniqlanmoqda. Dunyoning ikkinchi raketkasi Yannik Sinner faoliyatida ilk bor Franciya Ochiq chempionatining yarim finaliga yo'l oldi. Italiyalik tennischi 1/4 finalda reytingning 10-pog'onasida borayotgan bolgariyalik Grigor Dimitrovni uch set natijasiga ko'ra taslim etdi - 6/2, 6/4, 7/6(3).

Sinner tennischilarning o'zaro uchrashuvlaridagi hisobni yiriklashtirdi - 4:1. Ikki soatu 32 daqiqa davom etgan bahsda Sinner 8, Dimitrov 5 ta eys zarbasini amalga oshirgan. Qo'shxatolar 0 ga 5 ko'rinishida Grigor "foydasi"ga hal bo'ldi. Breyklar bo'yicha ustunlik g'olib tennischi tomonida - 4 ga 1! Endi u final chiptasi uchun Karlos Alkarazga qarshi kortga chiqadi.