Sohil voleyboli: hamyurtlarimizning xalqaro maydondagi debyuti qanday chiqmoqda?

Mazkur turnir doirasida mamlakatimizda sohil voleybolini rivojlantirish maqsadida xalqaro seminar ham tashkil etildi.

Ko'rilgan amaliy harakatlar natijasida qisqa muddatda sohil voleyboli bo'yicha terma jamoa shakllantirildi. SHu kunlarda ular o'zlarining dastlabki xalqaro musobaqasida ishtirok etishmoqda.

7-9 may kunlari Olma-Ota shahrida qozog'istonlik taniqli shoir, yozuvchi, adabiyotshunos, qolaversa davlat va jamoat arbobi Oljas Suleymanov tavalludining 85 yilligiga bag'ishlab havaskorlar va professionallar o'rtasida xalqaro turnir tashkil etildi. Unda o'zbekistonlik voleybolchilar ham o'z omadini sinab ko'rishyapti.

Musobaqa uchta yo'nalishda, yani 2x2 (erkaklar va ayollar), 4x4 (erkaklar va ayollar) hamda faxriylar (+40 yosh va +50 yosh) o'rtasida tashkil etildi.

2x2 yo'nalishida vatanimiz sharafini ikkita jamoa himoya qildi. Agar O'zbekiston-2 jamoasi bittadan g'alaba, durang va mag'lubiyat bilan o'z ishtirokini ancha erta yakunlagan bo'lsa, O'zbekiston-1 jamoasi esa yarim finalgacha etib bordi va bo'lg'usi chempionlarga imkoniyatni boy berdi.

4x4 yo'nalishidagi musobaqalarda ishtirok etayotgan jamoamiz esa finalga yo'l oldi va ular ertaga oltin medal uchun qum ustiga chiqadi.

SHuningdek, ertaga faxriylar o'rtasida ham musobaqa tashkil etiladi. Ushbu yo'nalishda ham o'zbekistonlik sportchilar o'z imkoniyatlarini sinovdan o'tkazishadi.

Bo'lajak o'yinlarda vakillarimizga omad tilaymiz.