“Sportni sev, sport bilan yasha!”: Qorao'zaklik voleybolchilar Qoraqalpog'istonda tengsiz

O'zbekiston Respublikasi Prezidentining 2020 yil 30 oktyabrdagi “Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida”gi PF-6099-son Farmon ijrosini taminlash, aholini keng sportga jalb etish maqsadida Jismoniy tarbiya va sport vazirligi hamda Milliy olimpiya qo'mitasi tashabbusi bilan “Sportni sev, sport bilan yasha!” shiori ostida Respublika ommaviy musobaqasi o'tkazilmoqda. Qoraqalpog'istonda ham musobaqaning yanvar oyligi yakunlandi.

Rejaga ko'ra, ushbu hududda voleybol bo'yicha bellashuvlar bo'lib o'tdi. 1 oy davom etgan hududiy bosqich bellashuvlarida 160 nafar havaskor voleybolchilar 16 ta jamoaga bo'lingan holda bahs olib borishdi. Final bellashuvlari 30-31 yanvar kunlari Nukus shahridagi 1-BO'SMda tashkil etildi. Saralash bosqichlarida barcha raqiblarini dog'da qoldirgan Qorao'zak va SHumanay tumani vakillari g'oliblik uchun maydonga chiqishdi. Qiziqarli va shiddatli o'tgan final bellashuvi qorao'zaklik voleybolchilar foydasiga hal bo'ldi. Uchinchi o'rin esa Taxiatosh tumani jamoasiga nasib etdi.

Musobaqaning taqdirlash marosimi ham ko'tarinki ruhda o'tib, unda MOQ, Qoraqalpog'iston Respublikasi Jismoniy tarbiya va sport vazirligi, O'zLiDep, Yoshlar agentligi, Milliy gvardiya qo'mondonligi mutasaddilari ishtirok etishdi. Endi qoraqalpoqlik yoshlar fevral oyida stol tennisi bo'yicha o'z imkoniyatlarini sinovdan o'tkazishadi.