Stol tennisi bo'yicha "Mustaqillik kubogi" musobaqasi bo'lib o'tdi

Mazkur onlayn musobaqa o'tkazilishidan asosiy maqsad aholi o'rtasida Olimpiya o'yinlari turkumiga kiruvchi sport turlarini yanada ommalashtirish, pandemiya davrida sport va jismoniy tarbiya bilan shug'ullanishlari uchun imkoniyat yaratish, terma jamoaga yangi istedodli stol tennischilarni saralashdan iborat.

Kecha, 24 avgust kuni “ZOOM” platformasi orqali tashkil etilgan onlayn musobaqaning ochilish marosimi bo'lib o'tgan edi. Marosimni O'zbekiston stol tennisi federaciyasi raisi Saida Mahmudova kirish so'zi bilan ochib berdi va ishtirokchilarga musobaqa davomida omad yor bo'lishi hamda eng ulug', eng aziz bayramimip – Mustaqilligimizning 29 yilligi bilan sport ixlosmandlarini tabrikladi.

Davlatimiz madhiyasi yangragandan so'ng, stol tennischilar bahslarga kirishdi. Ikki kun davom etgan bahslarda Qoraqalpog'iston Respublikasi, Toshkent shahri va barcha viloyatlardan stol tennisi ustalari bahslashishdi.

Musobaqaning birinchi kuni qizlar bahsi bilan boshlandi. Mazkur bellashuvlarda birinchi o'rinni Toshkent shahar vakilasi Gufranova Rimma egallagan bo'lsa, ikkinchi o'rinni Andijon viloyatidan Saida Olimjonova egalladi. Kuchli uchlikni esa Toshkent viloyati vakilasi Kamila Xoliqova yakunlab berdi.

Bugun esa onlayn musobaqani erkaklar davom ettirishdi. Qiziqarli kechgan bahslarda Andijon viloyati terma jamoasi azosi Qutbidillo Teshaboev bosh sovrinni qo'lga kiritgan bo'lsa, ikkinchi o'rin farg'onalik SHahzod Toshtemirovga nasib etdi. Qoraqalpog'iston Respublikasi terma jamoasi azosi Doniyor Toramuratov esa uchinchi o'ringa munosib deb topildi.