Surxondaryolik o'qituvchilar 17 soatda 136 km masofani bosib o'tishdi va mamlakat rekordini yangilashdi

O'zbekiston Respublikasi Prezidentining 2020 yil 30 oktyabrdagi «Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida»gi Farmoni ijrosini taminlash maqsadida, Surxondaryo viloyati Denov tumani hokimligi, tuman talim, fan va madaniyat xodimlari kasaba uyushmasi kengashi hamda tuman jismoniy tarbiya va sport bo'limi hamkorligida o'ziga xos, tabir joiz bo'lsa supermarafon tashkil etildi.

Gap shundaki, professionallar o'rtasida o'tkaziladigan marafon musobaqasida ham atletlar 42 kilometr 195 metr masofani bosib o'tishadi. To'g'ri, buning uchun ular 3 soatdan ko'proq vaqt sarflashadi. Surxondaryoliklar esa bu masofani uch hissadan ziyodroqqa ko'paytirgan holda yugurish va sportcha yurish orqali bosib o'tishdi.

Kecha surxondaryolik marafonchilar «Denov-Termiz» yo'nalishi bo'ylab 136 kilometrlik masofani yugurish va sportcha yurish bilan to'liq bosib o'tish uchun startga chiqishgan edi. Ushbu supermarafonda tuman xalq talimi bo'limi metodisti Faxriddin Xudoyberdiev, shuningdek, bir guruh jismoniy tarbiya fani o'qituvchilari, jumladan 4-sonli umumtalim maktabidan Rustam SHerniyozov, 27-sonli umumtalim maktabidan SHerzod Ergashev hamda Akmal Toshev, 52-sonli umumtalim maktabidan Akmal Valiev, 66-sonli umumtalim maktabidan Dilmurod Bo'taev, 68-sonli umumtalim maktabidan Musurmon Sattorov hamda 71-sonli umumtalim maktabdan Erkin To'raevlar qatnashdi.

Kecha, yani 1 dekabr kuni soat 15:00da Denov pedagogika va tadbirkorlik instituti binosi oldidan startga chiqqan marafon ishtirokchilari tuni bilan dam olishmagan holda bugun soat 10:00da Termizga etib kelishdi. Yo'l-yo'lakay marafonchilar qishloqlarda istiqomat qiluvchi aholini sog'lom turmush tarziga targ'ib etib borishganini ham alohida etirof etish kerak.