Denovdagi kurash musobaqasida taniqli polvon pichoqlab o'ldirildi

Bu haqda Kun.uz manbasi xabar berdi. Maydonda milliy kurash bo'yicha mahalliy musobaqa o'tkazilgan.

Musobaqada Nizomiddin polvonning o'g'li Ayubxon Xurramov raqibi Bo'stonbek Jabborov ustidan g'alaba qozongan. Ukasining mag'lubiyatidan g'azablangan Doston Jabborov esa Nizomiddin polvonning orqa tomonidan kelib, bir necha bor unga pichoq bilan zarba bergan. Buning natijasida og'ir jarohatlar olgan Nizomiddin CHo'tboev zudlik bilan tuman tibbiyot birlashmasiga olib borilganiga qaramay, jonlantirish bo'limida vafot etgan.

Sud-tibbiy ekspertizasining dastlabki xulosasiga ko'ra, marhumning tanasiga to'rt marotaba og'ir pichoq zarbasi berilgan. Ko'krak qafasi, bel va dumba sohalariga etkazilgan jarohatlar ichki organlarni teshib o'tgan va hayot uchun xavfli bo'lgan og'ir tan jarohati sifatida baholangan.

Mazkur holat yuzasidan shu kunning o'zida Denov tuman prokuraturasi tomonidan Doston Jabborovga nisbatan Jinoyat kodeksining 97-moddasi 2-qismi «l» bandi (bezorilik oqibatida qasddan odam o'ldirish) bilan jinoyat ishi qo'zg'atilgan. Gumonlanuvchi JPKning 221-moddasi tartibida ushlangan. Hozirda tuman prokuraturasi tomonidan dastlabki tergov harakatlari olib borilmoqda.

Kun.uz nashri manbasiga ko'ra, Doston Jabborov muqaddam sudlangan bo'lib, zo'ravonligi bilan tanilgan shaxs hisoblanadi.