Tennischilarimiz sovrindorlar orasida + FOTO

Jumladan, ROZTM tarbiyalanuvchilari aprel oyida bo'lib o'tgan O'zbekiston chempionatida jami 51 ta medallarni (shundan 18 ta oltin, 19 ta kumush, 14 ta bronza) qo'lga kiritishdi. Aprelning so'nggi kunlari poytaxtimizda o'tgan Xalqaro tennis federaciyasi ITF tasnifiga kiruvchi J-3 xalqaro turnirida sport maktabining 18 yoshgacha bo'lgan terma jamoasi azolari ham ishtirok etishdi. Unda Fayzullo Mirzag'aniev (yakkalikda 2-o'rin), Ismoil Xayriddinov (juftlikda 1-o'rin), Maftunabonu Qahramonova (juftlikda2-o'rin), Munisa Ashurbekova (juftlikda 2-o'rin), Farida Marimova (juftlikda3-o'rin) kuchli uchlikdan joy egallashdi. 

SHuningdek, shu yosh toifasidagi tennischilar 15-29 may kunlari Bishkek shahrida Xalqaro tennis federaciyasi ITF tasnifiga kiruvchi J-5 xalqaro turnirda qatnashdi. Xususan, Ismoil Xayriddinov juftlikda (Amir Milushev, O'zbekiston) 3-o'rinni egalladi. Yana bir umidli sportchi Fayzullo Mirzag'aniev musobaqaning chorak finaliga chiqqandi. Biroq jarohati bois Fayzullo turnirni erta tark etishga majbur bo'ldi. 

Qolaversa, istedodli tennischilarimiz Bishkek va Dushanbe shaharlaridagi turnirlarda muvaffaqiyatli ishtirok etib, yurtimiz sharafini munosib himoya qilishdi. O'tgan oyda Tojikiston poytaxtida ATF (Osiyo tennis federaciyasi) tasarrufi ostida o'tgan xalqaro turnirda kechgan bellashuvlarda ham yakkalik va juftlik yo'nalishlarda o'z omadlarini sinab ko'rishdi. Jumladan, Abdulaziz Usmonjonov ikki bor yakkalikda tengsiz topilgan bo'lsa, juftlikda ham ikki bor Javohir Mirzakamolov bilan shohsupaning eng yuqorisiga ko'tarilishdi. SHuningdek, Nuriddin Baxtiyorov (juftlikda 2 va 3-o'rin, yakkalikda 3-o'rin),Abdurahmon Xojiboev (2 va 3-o'rin, juftlikda), Abdulloh Dilshodov (ikkita 2-o'rin, juftlikda), sovrindor bo'lishdi. 

Xabaringiz bor, O'zbekiston 2025 yilgi yoshlar o'rtasida IV yozgi Osiyo o'yinlariga mezbonlik qiladi. Takidlash joizki, yuqorida nomlari tilga olingan umidli sportchilar tennis bo'yicha O'zbekiston o'smirlar terma jamoasining etakchi azolari sanaladi. Ular yurtimizda kechadigan bo'lajak Osiyo o'yinlarida mamlakatimiz shanini himoya qilishadi.