Tokio-2020. Boks janglarini baholash tizimida yangilik malum qilindi, Rio Olimpiadasida ishlagan hakamlar esa faoliyat olib bormaydi

Barchamiz hamyurtlarimiz ishtirokidagi janglarni katta hayojon bilan kuzatib boramiz. Ayniqsa, har bir raund yakuniga etgach hakamlarning bokschilarga qanday ochko berganini hamma katta hayajon bilan bilishni istaydi. 

Xalqaro Olimpiya qo'mitasining boks bahslarini o'tkazish va nazorat qilib borish uchun tuzgan komissiyasi yangi qaror qabul qildi. Unga ko'ra, Tokio Olimpiadasining saralash bahslari va Olimpiya o'yinlarida o'tkaziladigan janglarda hakamlarning bokschilar uchun bergan ochkolari har bir raund yakunida elon qilib boriladi. Bu holatga Rio Olimpiadasi vaqtida ham guvoh bo'lgan edik.  

Morinari Vatanabe boshchilik qilayotgan maxsus komissiya ochkolarning bunday elon qilinishiga baholanish mezonining shaffof va adolatli bo'lishi kerakligi bilan izoh bermoqda. XOQning malum qilishicha, bunday qaror sportchilar bilan o'tkazilgan konsultaciyadan so'ng qabul qilingan. Yana bir etiborli jihati shundaki, maxsus komissiyaning qaroriga ko'ra, Rio Olimpiadasining boks bahslarida ishlagan referilar yangi Olimpiya o'yinlari saralash musobaqalari va Tokio-2020da faoliyat olib bora olmaydi, deb xabar bermoqda MOQ matbuot xizmati.

Eslatib o'tamiz, Osiyo qitasi va jahon miqyosida Olimpiya o'yinlariga yo'llanma beruvchi boks turnirlari kelasi yilning 3-14 fevral kunlari Xitoyning Uxan, 13-24 may kunlari esa Franciyaning Parij shaharlarida o'tkaziladi.