Tomas Bax Milliy Olimpiya qo'mitalar vakillari bilan onlayn uchrashuv tashkil qildi

Ayni paytda yuzaga kelgan epidemiologik vaziyatda Olimpizm harakatining istiqboli, Tokio-2020 Olimpiya o'yinlariga ko'rilayotgan tayyorgarlik mavzusiga bag'ishlangan mazkur tadbirda XOQ mutasaddilari, barcha MOQ vakillari, shuningdek, O'zbekiston Milliy olimpiya qo'mitasi Bosh kotibi Oybek Kasimov hamda Xalqaro aloqalar departamenti direktori Kamoliddin Ergashev ishtirok etishdi.

Dastlab Tomas Bax uchrashuv mavzusi yuzasidan nutq qildi.

“Bugungi epidemiologik vaziyat sportning insoniyat hayotida ne chog'lik muhim ekanligini ko'rsatib berdi. Biz karantin davrida ilgari surgan #StayStrong #StayHealthy #StayActive shiorlari Olimpiya harakati vakillarini yanada jipslashtirdi. Yaponiya hukumati bilan Tokio Olimpiadasining tashkiliy masalalari bo'yicha hamkorlik qilmoqdamiz. Avval takidlab o'tganimizdek, bizning bosh maqsad bo'lajak Olimpiya o'yinlarini sportchilar uchun xavfsiz tashkil qilishdir”, – dedi XOQ rahbari.

Tadbir davomida Oybek Kasimov yurtimizda karantin davrida olib borilayotgan ishlar, muhtaram Prezidentimiz tomonidan ilgari surilgan 5 tashabbus, hukumatimizning ne chog'lik sportni qo'llab-quvvatlayotgani, Jismoniy tarbiya va sport vazirligi bilan atletlarimizning uy sharoitida shug'ullanishlari uchun barcha sharoitlar yaratib berilgani haqida Xalqaro Olimpiya qo'mitasiga malum qildi. 

Onlayn uchrashuv davomida qatnashchilar Olimpiya o'yinlariga licenzion musobaqalarni o'tkazish tizimi, sportchilar uchun Tokio Olimpiadasida yaratib beriladigan sharoitlar kabi yo'nalishlarda o'zlarini qiziqtirgan savollar bilan murojaat qilishdi.