Tunislik tennischi Berlinni zabt etdi

Hal qiluvchi final uchrashuvida dunyoning to'rtinchi raqamli tennis malikasi bo'lib turgan Ons Jaber WTA reytingining 17-pog'onasidan joy olgan shveycariyalik Belinda Benchichga qarshi kortga chiqdi. Birinchi set 6/3 hisobida Ons foydasiga hal bo'ldi. Ikkinchi setning uchinchi geymidan so'ng Belinda bahsni davom ettira olmasligini malum qildi. Bu paytda hisob 2/1, Jaber foydasiga bo'lib turgandi.

SHu tariqa, 54 daqiqa davom etgan va yakuniga etmay qolgan final uchrashuvida 27 yoshli Ons Jaber bosh sovrinni qo'lga kiritdi. U 6 ta eys, 3 ta breykni amalga oshirib, umuman qo'shxatoga yo'l qo'ymadi. 25 yoshli Belinda esa o'z hisobiga 1 tadan eys va breyk hamda uchta qo'shxato yozib qo'ydi. 

Bugun elon qilingan yangi reytingda Ons Jaber uchinchi o'ringa ko'tarilib oldi. Bu uning faoliyatidagi eng yaxshi ko'rsatkich hisoblanadi. Jaber faoliyatidagi uchinchi sovrinini qo'lga kiritdi. Berlindagi muvaffaqiyatli ishtirokidan u €93,823 pul mukofoti va 470 reyting ochkosi ishlab oldi.