Turkmaniston Olimpiadadagi ishtirokini medalsiz yakunladi

Lekin to'rt yillikning eng nufuzli musobaqasida ikkita milliy rekord yangilandi. Rio Olimpiadasida Turkmaniston terma jamoasi 9 nafar sportchi bilan ishtirok etdi. Ular dzyudo, og'ir va engil atletika, boks va suzish musobaqalarida o'z imkoniyatlarini sinovdan o'tkazishdi.

Turkmanistonlik sportchilar orasidan so'nggi bo'lib Amanmurod Xommadov engil atletikaning bosqon uloqtirish musobaqasida ishtirok etib, 33 sportchi orasida 30-o'rinni egalladi.

Turkmaniston terma jamoasi uchun Rio Olimpiadasidagi eng yaxshi natija – 13-o'rin bo'ldi. Bu natijaga bokschi Araslanbek Ochilov va og'ir atletikachi Gulnabat Qodirova erishdi. Qodirova ikki kurashda 195 kilogramm toshni o'ziga bo'ysundirdi. Suzish musobaqasining chalqancha usuldagi bahslarida ishtirok etgan Merdan Ataeva 100 metr masofada 56,34 soniya natija bilan milliy rekordni yangiladi.

Eslatib o'tamiz, Turkmaniston terma jamoasi Olimpiadada 1996 yildan beri ishtirok etib keladi. Lekin hozircha ularga to'rt yillikning eng nufuzli musobaqasida medal olish nasib qilmayapti. Aynan Turkmaniston MDH va Boltiqbo'yi mamlakatlari orasida Olimpiada medalini olmagan yagona davlat xisoblanadi.