"Uimbldon". Erkaklar o'rtasidagi final bahsi bo'lib o'tdi + FOTO

Hal qiluvchi final uchrashuvida sayyoramizning birinchi raketkasi, serbiyalik Novak Jokovich hamda ATP reytingining 9-pog'onasidan joy olib turgan italiyalik Matteo Berrettini o'zaro to'qnash kelishdi. Uch soatu 23 daqiqa davom etgan bahsda tajriba o'z so'zini aytdi va Novak 6/7(4), 6/4, 6/4, 6/3 hisoblarida g'alaba qozondi.

Novak uchrashuv davomida 5 ta, Matteo esa 16 ta eys zarbasini amalga oshirdi. Tennischilarning o'zaro uchrashuvlarida Jokovich hisobni yiriklashtirdi - 3:0. 

SHu tariqa, Novak Jokovich faoliyatidagi yigirmanchi "Katta Dubulg'a" turniri bosh sovrinini qo'lga kiritdi. Yutib olingan umumiy sovrinlari esa 85 taga etdi. Novak "Uimbldon" turniridagi bu yilgi ishtirokidan 2000 reyting ochkosi hamda 1 million 700 ming funt sterling mukofot puli ishlab oldi. Berrettini esa 1200 ochko va £900,000 funtga ega bo'ldi. 

Serbiyalik tennischi turnir yakunlariga ko'ra dunyoning birinchi raketkasi bo'lib qoladi. U ikkinchi o'rinda borayotgan rossiyalik Daniil Medvedevni 1743 ochkoga ortda qoldiryapti. Berrettini esa Rojer Federerni ortda qoldirib, 8-o'ringa ko'tarilib oladi. 

Jokovichning faoliyatida ishlab topgan pullari 152,1 million dollardan oshdi. Bu tennis tarixidagi rekord natijadir. Aynan Novak birinchi bo'lib 150 millionlik dovonni zabt etgandi.