Uimbldon. Jokovich 5 setdan iborat uchrashuv o'tkazdi

Dunyoning uchinchi raketkasi Novak Jokovich musobaqaning chorak finalida ajoyib kambekni amalga oshirdi. Serbiyalik yulduz setlar bo'yicha 0:2 hisobida yutqaza turib, yakunda irodali g'alabaga erishdi. 

Novak Jokovich ATP reytingida 13-o'rinni egallab turgan italiyalik Yannik Sinnerni 5/7, 2/6, 6/3, 6/2, 6/2 hisobida mag'lubiyatga uchratdi va yarim finalga yo'l oldi. Tennischilarning o'zaro uchrashuvlaridagi hisob 2:0 ko'rinishiga keldi. 

Uch soatu 39 daqiqa davom etgan bahsda Jokovich 7, Sinner 8 ta eys zarbani ijro etgan. Qo'shxatolar Novakda 5, Yannikda esa 7 tani tashkil etdi. Serbiyalik 6, italiyalik esa 4 ta breykni amalga oshirgan. 

Malumot uchun, Novak Jokovich faoliyatida ettinchi bor 0:2 hisobidagi mag'lubiyatdan g'alaba bilan chiqib ketdi. Bu uning "Uimbldon" turniridagi qatorasiga qozongan 26-g'alabasi bo'ldi.