Urganchda mohir sportchilar taqdirlandi + FOTO

Binobarin, ushbu tashkilot vohada sportning texnik va amaliy turlarini yanada rivojlantirish, uning ommaviyligini oshirish yo'lida muhim o'rin tutadi. 

Bugungi kunda kengash tasarrufidagi viloyat texnik va amaliy sport turlari markazi, shahar va tumanlardagi o'quv sport texnika klublarining sport sekciyalarida xorazmlik yoshlar o'zlari mehr qo'ygan yozgi biatlon, triatlon(duatlon), pnevmatik quroldan o'q otish, motokross, karting, aviamodel, raketamodel, radiosport va parashyut sporti singari sport turlarini katta qiziqish va ishtiyoq bilan o'zlashtiryapti. 

Mashg'ulotlardan tashqari, belgilangan reja asosida uyushtirilayotgan musobaqalar ularning tajriba va mahoratini maromiga etkazishga xizmat qilayotir. O'z navbatida vohalik sportchilar respublika miqyosidagi chempionat va birinchiliklarda sovrindorlar safidan joy olishayotir.

Malumki, har yili 23 noyabr - O'zbekiston mudofaasiga ko'maklashuvchi “Vatanparvar” tashkiloti tashkil topgan kun sifatida keng nishonlanadi. Joriy yil ham bundan mustasno bo'lmayapti. Joylarda mazkur sanaga bag'ishlab sport musobaqalari va manaviy-marifiy tadbirlar o'tkazilmoqda. Xorazm viloyati kengashida uyushtirilgan bayram tadbiri ham ana shular sirasiga kiradi. Tizimning eng faol xodimlari va mohir sportchilari tadbirning ezozli mehmonlari bo'lishdi.

Tadbirda qatnashgan kengash raisi Davronbek Ibragimov yig'ilganlarni qutlug' ayyom bilan muborakbod etib, sohani yanada rivojlantirish yo'lida qo'shayotgan munosib xizmatlariga minnatdorlik ramzi sifatida faxriy yorliq va sovg'alar bilan taqdirladi.

Ikrom XUDOYBERGANOV, Urganch shahridan