Vazir umumiy qiymati 1 mlrd. 200 mln. so'mni tashkil etuvchi yangi boks zali ochilishida qatnashdi + FOTOREPORTAJ

Jumladan, Namangan viloyati Norin tumani bolalar-o'smirlar sport maktabi qoshida bir akademik soatda 20 nafardan ziyod yoshlar mashg'ulot olib borishlari mumkin bo'lgan yangi boks zali foydalanishga topshirildi.

Barcha sharoitlarga ega ushbu boks zalining ochilish marosimida Jismoniy tarbiya va sport vaziri Dilmurod Nabiev hamda Norin tumani hokimi Dilmurod Qodirov ishtirok etdi.

Umumiy qiymati 1 mlrd. 200 mln. so'mni tashkil etuvchi bu zalda ring va sportchilar uchun maxsus trenajyor xonasi mavjud. Ushbu mo'jazgina boks zalida 4 nafar trener qo'l ostida 200 nafarga yaqin yoshlar boksning sir-asrorlarini o'rganishi mumkin.

- Biz Norin tumanini sport sohasida Respublikadagi eng namunali tumanga aylantirish loyihasini amalga oshirmoqdamiz. O'tgan yili tumandagi bolalar-o'smirlar sport maktabi qoshida ko'p tarmoqli sport zali foydalanishga topshirilgan edi. Bugun tuman yoshlari uchun yangidan bunyod etilgan zamonaviy boks zalini topshirmoqdamiz. Umid qilamanki, kelajakda boshqa sport turlari qatori norinlik bokschilar ham jahon arenalarida yorqin g'alabalarni qo'lga kiritishadi. Bizning asosiy maqsadimiz, tumanda sport bilan muntazam shug'ullanuvchi yoshlar sonini bosqichma-bosqich oshirib borish. Buning natijasida aholining sog'lom turmush darajasini yaxshilanishiga erishamiz, - dedi boks zalining ochilish marosimida Jismoniy tarbiya va sport vaziri D.Nabiev.