“W15 Shymkent”. 3 nafar tennischimizdan muvaffaqiyatsiz ishtirok

Musobaqada bugun 3 nafar tenischimiz o'z o'yinlarini o'tkazdi.

Turnirda 1-raqam ostida saralangan tennischimiz Sabina SHaripova rossiyalik Valeriya Olyanovskayaga qarshi kortga chiqdi. 1 soatu 32 daqiqa davom etgan uchrashuvda SHaripova birinchi setni 2/6 hisobida boy berib qo'ydi. 2-setda hisob 2/2 bo'lib turganda Sabina o'yinni oxirigacha davom ettirolmasligini bildirdi va rossiyalik tennischi keyingi bosqichga yo'l oldi.  

SHuningdek, yana bir vakilimiz Larisa Bekmetova mezbonlar vakilasi Ekaterina Dmitrichenkoga qarshi o'yin o'tkazdi. 1 soatu 41 daqiqa davom etgan uchrashuvda afsuski, Larisa 2/6, 4/6 hisobida yutqazib qo'ydi va musobaqani tark etdi. 

Musobaqada ishtirok etayotgan tennischilarimizdan yana biri Milana Maslenkova rossiyalik tennischi Alina Silich bilan to'qnash keldi. Uchrashuv 1 soatu 40 daqiqa davom etdi. Afsuski, Milana 2 setda raqibasiga 5/7, 1/6 hisobida imkoniyatni boy berib qo'ydi.