XXX Butunjahon yozgi Universiada o'yinlari g'oliblari tantanali kutib olindi

Unda O'zbekiston sport delegaciyasi ikkitadan oltin va kumush hamda to'rtta bronza, jami sakkizta medal jamg'argan holda 112 ta davlat orasida umumjamoa hisobida 19-o'rinni egalladi.

10 kun davom etgan ushbu nufuzli musobaqada sayyoramizning 112 ta davlatidan kelgan jami 5 971 nafar sportchi 18 ta sport turi bo'yicha 222 ta medallar jamlanmasi uchun bahs olib bordi.

Kecha delegaciyamizning qolgan azolari, universiadada taekvondo va dzyudo bo'yicha bahslarda sovrindor bo'lgan sportchilarimiz yurtimizga qaytib keldi. Italiyadan yorug' yuz bilan qaytgan vakillarimiz Islom Karimov nomidagi Toshkent xalqaro aeroportida tantanali tarzda kutib olindi. Tadbirda Jismoniy tarbiya va sport vazirligi, tegishli federaciyalar mutasaddilari, sportchilarning yaqinlari, muxlislar va ommaviy axborot vositalari xodimlari ishtirok etishdi.

Kutib olish marosimida ishtirok etgan Jismoniy tarbiya va sport vazirining birinchi o'rinbosari Oybek Qosimov talaba sportchilarimizni g'alabalar bilan qutlar ekan, ulardan kelgusidagi nufuzli musobaqalarda ham shu kabi zafarli yurishlar kutilayotganini malum qildi.

Eslatib o'tamiz, yozgi universiadada dzyudochilarimizdan Diyora Keldiyorova (-52 kg), Hikmatillo To'raev (-73 kg) Muhammadkarim Xurramov (-100 kg) va Davlat Bobonov (mutlaq vazn) bronza medalni hamda taekvondochimiz Niyoz Po'latov kumush medalni qo'lga kiritgan edi.