Zarrux Adashev: UFC jangimga 100-150 ming dollar xarajat qildi

Xabaringiz bor, Adashev ikki hafta avval dunyoning eng kuchli promoushenidagi ilk jangida amerikalik Tayson Nemga birinchi daqiqadayoq nokaut bilan mag'lub bo'lgan edi. Zarrux kecha Instagram sahifasidagi onlayn muloqotda debyut jangiga to'xtaldi. 

"Men Glory, Bellator va boshqa promoushenlarda janglar o'tkazganman. Hech ikkilanishsiz ayta olamanki, UFC umuman boshqa dunyo. Bu ligada hammasi o'ta professional darajada tashkillashtiriladi. Men o'zimning jangim misolida bir-ikkita malumotlarni beraman.

UFC Tayson Nem va men uchun kamida 100 ming dollar sarfladi. Bu summa 150 ming dollargacha etishi ham mumkin. Aeroportning o'zida sizni alohida ism-sharifingiz yozilgan mashina kutib oladi. Sizni yuqori saviyadagi servis xizmati hamda iltifot bilan mehmonxonaga etkazishadi. U erda sizni jangga murabbiylardan tashqari dieotolog, psixolog alohida tayyorlaydi. Ularni UFCning o'zi sizga biriktirib beradi. 

To'g'ri, debyut jangim o'zim xohlagandek bo'lmadi. Buning o'ziga yarasha sabablari bor. Katta gonorar ham olmadim. Men uchun pul birinchi o'rinda emas. Gonorarni o'ylaganimda Bellator promoushenidan ketmasdim. U erda shaxsiy homiylarga ega edim. Oktagonga chiqadigan libosimning o'zida bir nechta kompaniyasni reklama qilardim", - dedi Adashev.