10 октябрь кунги UFC турнирининг асосий жанги тасдиқланди

Америкалик Брендан Аллен ва британиялик Кристиан Лерой Данкан ўртасида ўрта вазн тоифасидаги жанг 10 октябрь куни Лас-Вегасда бўлиб ўтадиган UFC Fight Night 290 турнирининг асосий воқеаси бўлади.

Брендан Аллен кетма-кет учта ғалабали серия қайд этмоқда. У жорий йилнинг июнь ойида бўлиб ўтган сўнгги жангида Эдмен Шахбазянни ҳакамларнинг якдил қарори билан мағлуб этган эди. Бундан ташқари, америкалик спортчи 90 килограммгача бўлган вазн тоифасида ACBJJ All-stars чемпиони ҳисобланади. У 30 август куни Истанбулда бўлиб ўтган турнирда россиялик Магомедрасул Гасановни тўпиғини қайириш (heel hook) усули билан таслим этиб, чемпионлик унвонини муваффақиятли ҳимоя қилганди.

Кристиан Лерой Данкан эса июль ойида Жаред Каннонир устидан ҳакамларнинг бир овоздан қабул қилган қарори билан ғалаба қозониб, кетма-кет бешинчи ғалабасини қўлга киритди.

Айни дамда Брендан Аллен ва Кристиан Лерой Данкан ташкилотнинг ўрта вазн тоифасидаги мета-рейтингида мос равишда бешинчи ва ўн биринчи ўринларни, шунингдек, матбуот томонидан тузилган дивизионнинг энг яхши жангчилари рўйхатида тўртинчи ва ўнинчи ўринларни эгаллаб турибди.