13 ёшли гроссмейстеримиз 20 ёшлилар мусобақасида пешқадамлик қиляпти

Илк бор ташкил этилаётган 1st ALAIN Juniors Chess Championship U20 турнирида ҳамюртимиз шахмат тарихида энг ёш иккинчи гроссмейстерга айланган, айни пайтда дунёнинг энг ёш гроссмейстери Нодирбек Абдусатторов ҳам муваффақиятли иштирок этяпти.

Мусобақада 11 давлатдан жами 143 нафар шахматчи дона суряпти. Улар орасида 2 нафар халқаро гроссмейстер ва 7 халқаро мастерларнинг борлиги турнирнинг нуфузидан дарак беради.

Кетма-кет 5та партияда ғалаба қозонган ҳамюртимиз 6 ва 7-партияларда кучли гроссмейстерлар билан дуранг ўйнади. Нодирбек аввалига мусобақанинг биринчи тартиб рақамли халқаро гроссмейстери ҳиндистонлик Диптаян Гош (2556) билан муросага келди.

Кеча эса қора доналарда ўйнашига қарамай, эронлик Маъсуд Мосадегпур билан дурангга имзо чекди. Бугун Абдусатторов 8-турда ўзи сингари 6 очкога эга арманистонлик Тигран Харутунянга қарши оқ доналарда ҳаракат қилади. Қўшимча кўрсаткичларга кўра айнан ҳамюртимиз мусобақада пешқадамлик қиляпти.