6 сентябрь – кураш миллий спорти куни тантанали нишонланди

Куни кеча Жанубий Кореяда ўтган Халқаро кураш ассоциациясининг конгрессида ташкилот аъзолигига яна 4 мамлакат қабул қилинди ва бугун ўзбек кураши дунёнинг 140 мамлакатида ўз ўрини топмоқда. 

Ўзбекистон Республикаси Президентининг 2017 йил 2 октябридаги қарорига кўра ушбу сана кураш миллий спорти куни деб белгиланган. Халқимизнинг минглаб йиллик қадриятларини ўзида мужассам этган курашни ёшлар ўртасида янада тарғиб қилиш, ўсиб келаётган ёш авлодни соғлом ва баркамол вояга етказиш мазкур спорт тури вакилларининг ҳам асосий мақсадларидан саналади.

Пойтахтимиздаги “Соғбон” спорт мажмуасида ўтказилган кураш байрами Бирлашган Миллатлар ташкилотининг “Бола ҳуқуқлари тўғрисидаги” конвенцияси қабул қилинганининг 30 йиллиги билан биргаликда нишонланиши эса муштарак мақсадлар йўлидаги қадамлардан биридир.

Ўзбекистон Республикаси Бош прокуратураси ва Ўзбекистон кураш федерацияси томонидан ташкил этилган ушбу тадбирда пойтахтимиздаги меҳрибонлик уйи тарбияланувчилари юртимизнинг номдор курашчиларининг маҳоратларидан баҳраманд бўлишди. 

Тадбир давомида куни кеча Жанубий Кореяда ўтган жаҳон чемпионатида юқори ўринларни эгаллаб қайтган терма жамоамиз аъзоларининг ёшлар билан учрашуви ҳам ташкил этилди.

Кураш байрами болажонларнинг ўйин-кулгулари билан давом этди. Санъаткорларнинг чиқишлари эса байрамга завқ бағишлади.