Биволнинг менежери Канелога қарши реванш жанги қачон бўлишини маълум қилди

"Афсуски, Геннадий бу сафар буни уддалай олмади. Ёши оз бўлса-да, ўз зарарига ишлади. Дмитрийнинг Канелога қарши реванш жанги долзарб мавзу. Аммо, энди бизнинг вазифамиз 5 ноябрь куни Аду-Дабида Хильберто Рамиресга қарши жанг қилиш. 

Канело билан реванш жанги ҳақида гапирадиган бўлсак, у жангдан сўнг қўлидан жароҳат олгани ҳақида айтган. Шу сабаб реванш жанги келаси йилнинг иккинчи чорагида бўлиши мумкин", - деди Корнилов Матч ТВ телеканалига берган интервьюсида. 

Эслатиб ўтамиз, якшанба тонгида Лас-Вегасда бўлиб ўтган бокс оқшомида Альварес 40 ёшли қозоғистонлик Геннадий Головкинга қарши трилогия жангини ўтказди. Май ойида Сауль фаолиятидаги иккинчи мағлубиятини Димитрий Биволдан қабул қилиб олганди. Ўша жанг шартномасига кўра реванш жанги варианти ҳам бор эди. Головкинни мағлуб этганидан сўнг, Канело яна реванш жанги ҳақида гапирди.