Абдулла Тангриев педагогика фанлари бўйича фалсафа доктори бўлди

У педагогика фанлари бўйича фалсафа доктори (PhD) диссертация ишини муваффақиятли ҳимоя қилди.

Тангриев бугунги кунда Ўзбекистон давлат жисмоний тарбия ва спорт университетида олий тоифали тренер-ўқитувчи сифатида фаолият олиб бормоқда.

Маълумот ўрнида: Тангриев Абдулла Товошевич 1981 йил 28 март куни Сурхандарё вилоятида зиёлилар оиласида таваллуд топган. Сурхондарё вилояти Бойсун тумани 38-сонли ўрта таълим мактабига қабул қилиниб, ҳозирги Республика Олимпия ва Паралимпия спорт турларига тайёрлаш марказини тугатган. Ҳозирги кунда Ўзбекистон давлат жисмоний тарбия ва спорт университети “Халқаро кураш турлари назарияси ва услубияти” кафедрасида ўз иш фаолиятини олиб бормоқда.

2021 йилда Ўзбекистон давлат жисмоний тарбия ва спорт университетининг “Спорт фаолияти (фаолият турлари бўйича)” магистратура мутахассислигини тамомлаган. Тангриев - 1996-2019-йилларда дзюдо спорт тури бўйича миллий терма жамоа аъзоси бўлган. Ўз спорт амалиёт давомида 12 карра Ўзбекистон чемпиони ҳисобланади.

2000 йилда Гонгконгда бўлиб ўтган ёшлар ўртасидаги Осиё чемпионати ғолиби, 8 марта Осиё чемпионати иштрокчиси сифатида 1 мартта кумуш медаль, 1 марта бронза ҳамда 2003-2005-2007-2008-2011-2015- йилларда катталар ўртасида Осиё чемпиони. 5 мартта Осиё ўйинлари совриндори, 4 марта Жаҳон чемпионати совриндори ҳамда чемпиони ҳисобланади.

Тўққиз марта IJF Grand Slam ва Grand-Prix мусобақалари чемпиони ҳамда совриндори. 5 марта Ёзги универсиада ўйинлари чемпиони ҳамда совриндори. 4 карра Олимпия ўйинлари иштрокчиси, 2008 йил Пекин Олимпиадаси кумуш медали соҳиби.

Ўзбекистон Республикаси Президенти томонидан 2003 йил “Шуҳрат" медали, 2007 йил “Ўзбекистон Республикасида хизмат кўрсатган спортчи”, 2008 йил “Ўзбекистон Ифтихори” фахрий унвонлари билан мукофотланган.

Ҳозирги кунда Абдулла Тангриев дзюдо спорт тури бўйича олий тоифали тренер-ўқитувчи сифатида Ўзбекистон, Осиё ҳамда Жаҳон чемпионлари ва совриндорларини тайёрлашда ўз ҳиссасини қўшиб келмоқда. Оилали, тўрт нафар фарзанднинг отаси.