“Афросиёб Арена”да енгил атлетика бўйича Марказий Осиё IV Очиқ чемпионати ўтказилмоқда

Мазкур мусобақада ҳамюртларимиздан ташқари Қирғизистон, Қозоғистон, Туркманистон, Тожикистон, шунингдек, таклиф бўйича Таиланд ва Малайзия каби давлатлардан 200 нафарга яқин спортчи қатнашмоқда.

Халқаро турнирга “Афросиёб Арена” спорт мажмуаси мезбонлик қиляпти. Мазкур спорт мажмуаси 15 минг томошабинни ўз бағрига сиғдира олади.

2022 йилда Ўзбекистон Республикаси Президенти Шавкат Мирзиёевнинг ташаббусларига биноан қурилиши бошланган спорт мажмуасида World Athletics Бутунжаҳон енгил атлетика федерациялари ассоциацияси талабларига мувофиқ ҳолда кенг кўламдаги реконструкция ишлари амалга оширилди.

Стадион сўнгги русумдаги спорт ускуналари, замонавий югуриш қопламаси, дренаж тизими, ёритиш ва овоз тизимлари билан жиҳозланган. Бугунги кунда “Афросиёб Арена” спорт мажмуаси – Ўзбекистондаги халқаро спорт мусобақаларини қабул қилишга муносиб бўлган дастлабки сертификатланган стадион ҳисобланади. Таъкидлаш керак, “Афросиёб Арена” спорт мажмуаси Марказий Осиё IV Очиқ чемпионати арафасида қуриб битказилди ва фойдаланишга топширилди.

Очиқ чемпионатда енгил атлетикачилар асосан югуриш ҳамда техник турларда иштирок этишмоқда. Буларга баландликка сакраш, таяниб сакраш, узунликка сакраш, уч ҳатлаб сакраш, диск, болға, найза улоқтириш сингари йўналишлар киради.

Енгил атлетика бўйича Ўзбекистон терма жамоаси деярли барча турларда қатнашмоқда. Мусобақада V Ислом бирдамлиги ўйинлари ғолиб ва совриндорлари Шарифа Давронова, Анвар Анваров, Суҳроб Хўжаев, Фарида Солиева, Наргиза Қўчқорова, Роксана Худоярова каби маҳоратли спортчилар куч синашишмоқда.