Афруза Ҳамдамова икки карра жаҳон чемпиони!

Қувонарлиси, дунё биринчилигининг 16 ёшгача бўлган қизлар мусобақасида Афруза Ҳамдамова муддатидан аввал жаҳон чемпионига айланди. У энди икки карра жаҳон чемпиони. Ҳамюртимиз 10-турда ҳиндистонлик Мриттика Маликка қарши қора доналарда ўйнаганига қарамай, ғалаба қозонди. Афруза ўтган йили Италияда 14 ёшгача шахматчилар ўртасида ҳам жаҳон чемпиони бўлган эди. 

Ҳамдамова 10 та учрашувдан фақат биттасида дуранг ўйнаб, қолган барча партияларда зафар қучди. Афрузанинг энг яқин таъқибчиси ўзидан икки очко кам жамғарган. Бугун жаҳон чемпионимиз сўнгги 11-турда оқ доналарда қозоғистонлик Зарина Нургалиевага қарши баҳс олиб боради. Ҳамдамовада 9,5 очко бўлса, кучли учликдан жой олган германиялик Чарис Пеглау ва Зарина Нургалиева ҳисобида 7,5 тадан очко бор.   

Бразилиялидаги жаҳон чемпионатининг 14 ёшгача ўғил болалар мусобақасида қатнашаётган Жавоҳир Бозоров 10-турда қора доналарда FIDE байроғи остида ўйнаётган Алексей Прохоровга имкониятни бой бериб қўйди. У 6 очко билан қўшимча кўрсаткичларга кўра 31-ўринни эгаллаб турибди. Бу ёш тоифасида қозоғистонлик Эдгар Мамедов 8,5 очко билан якка пешқадамликни давом эттирмоқда.

Афсуски, 14 ёшгача қизлар мусобақасида иштирок этаётган Нилуфархон Имомқўзиева ҳам 10-турда мағлубият аламини тотиб кўрди. Шахматчимиз қора доналарда Оксана Горячкина (FIDE)га ютқазди ва совриндорлар сафидан жой олиш имкониятини кескин пасайтириб юборди. Бугун у сўнгги 11-турда ўзи сингари 7 очкога эга бўлиб турган грециялик Александри Димитрага қарши баҳс олиб боради. Бу ёш тоифасида Диана Ҳафизова (FIDE) 9 очко билан муддатидан аввал жаҳон чемпиони бўлди. Тўрт шахматчи 7,5 тадан очко жамғариб, кумуш ва бронза медалларга даъвогарлик қиляпти.