Афсонавий Чусовитина бошчилигидаги гимнастларимиз Жаҳон кубогидан қайтиб келишди

Ушбу нуфузли мусобақада дунёнинг 30та давлатидан энг кучли гимнастлар қаторида Ўзбекистон терма жамоаси аъзолари ҳам ғолиблик учун баҳс олиб боришди.

Қувонарлиси, мусобақада ўзбек спортининг афсонаси, Олимпиада ўйинларида 8 маротаба қатнашган тарихдаги ягона гимнастикачи Оксана Чусовитина етакчилигидаги бир гуруҳ спортчиларимиз юртимиз шарафини муносиб ҳимоя қилишди.

Жумладан, Жаҳон кубогининг таяниб сакраш машқларида яқинда 47 ёшга кирадиган фахримиз Оксана Чусовитина энг яхши натижа қайд этди ва олтин медалга сазовор бўлди. Шунингдек, терма жамоамиз аъзоларидан Ўткирбек Жўраев ҳамда Ҳабибулло Эргашев финал босқичида муносиб қатнашди ва кучли саккизликдан жой олишди.

Бугун тунда, 6 мартдан 7 мартга ўтар кечаси соат 02:00да спорт гимнастикаси бўйича Ўзбекистон терма жамоаси аъзолари юртимизга қайтиб келишди. Уларни Ислом Каримов номидаги Тошкент халқаро аэропортида Спортни ривожлантириш вазирининг ўринбосари Шахрулло Маҳмудов, «Ўзавтосаноат» АЖ бошқаруви раиси, Ўзбекистон гимнастика федерацияси раиси Шавкат Умурзоқов, спортчиларнинг яқинлари, мухлислар ва оммавий ахборот воситалари ходимлари тантанали равишда кутиб олишди.

Унда сўзга чиққан вазир ўринбосари Ш.Маҳмудов Оксана Чусовитинани яна бир бор ажойиб ғалаба билан табриклаб, Жаҳон кубогида қайд этилган натижани Осиё ўйинларида ҳам такрорлашига ишонч билдирди ва ушбу кўрсаткич билан ҳамюртимиз Осиё ўйинлари шоҳсупасига кўтарилиши учун етарли бўлишига умид қилишини таъкидлаб ўтди.

«Ўзавтосаноат» АЖ бошқаруви раиси ҳамда Ўзбекистон гимнастика федерацияси раиси Шавкат Умурзоқов ҳам Оксана Чусовитина спортимиз фахри эканлигини таъкидлаб, унга келгусида ҳам омад ёр бўлишини билдирди.

Ўз навбатида тадбирнинг бош қаҳрамони бўлмиш О.Чусовитина бундай юксак эътибор учун миннатдорлик билдириб, фаолиятини Ўзбекистон учун медаль ютгач якунлашини айтин ўтди.

Тадбир якунида афсонавий спортчимиз ОАВ ходимларига интервью берди.