Афсонавий Карпов даъвогар турнири фаворитини айтди

Дунёнинг саккиз нафар гроссмейстерлари ўртасида кечаётган турнир ғолиби жаҳон тожи соҳибига қарши ўйнаш ҳуқуқини қўлга киритади. Россия шахмат федерациясининг фахрий президенти, 12-жаҳон чемпиони Анатолий Карпов ҳамюрти Ян Непомняшийни ушбу турнир ғолиблиги учун асосий даъвогар деб атади. Айнан Ян аввалги даъвогарлар турнири ғолиби сифатида тож учун курашганди. 

"Турнир старти Ян учун бироз омадсиз келди. Лекин кейин у ўз ўйинини топиб олди. У учун хурсандман. Мусобақа таркиби жуда кучли, кимнидир алоҳида ажратиб кўрсатмаган бўлардим. Хикару Накамура, Фабиано Каруана, ҳиндистонлик шахматчилар кучли. Кураш охирги тургача давом этишига шубҳам йўқ. Шундай бўлса-да, Непомняшийнинг имкониятларини бироз юқорироқ баҳолаяпман", — дея Карповнинг сўзларини келтирмоқда "РИА Новости Спорт".

Маълумот учун, даъвогарлар турнири 22 апрелга қадар давом этади. Унинг ғолиби амалдаги жаҳон чемпиони, хитойлик Дин Лижэнга қарши тож учун ўйнаш ҳуқуқини қўлга киритади.