Афсонавий хоккейчи Вячеслав Фетисов Ўзбекистонга келади

Мусобақада Тунги хоккей лигасининг доимий иштирокчиси, Россиянинг «Премьер» жамоаси ҳамда мамлакатимизда фаолият олиб бораётган «Тошкент» ва «Ҳумо» клублари фахрий хоккейчилари қатнашади.

Турнир Ўзбекистон Республикаси Мудофаа вазирлиги, Туризмни ривожлантириш давлат қўмитаси, Ўзбекистон хоккей федерацияси ва «Тошкент» хоккей клуби ҳамкорлигида ташкил этилмоқда. Қизиқарли оммабоп томошалар билан бойитилган тантанали очилиш маросими 23 август куни соат 15:00 да муҳташам “Humo Arena” муз саройига туташ ҳудудда ўтказилади. Шу куни «Премьер» ва «Тошкент» жамоалари аъзолари дастлабки учрашувда куч синашади. 24 август куни соат 12.00 да россияликлар «Ҳумо» жамоасига қарши муз устига тушади.

Ўзбекистон хоккей федерацияси матбуот хизмати тақдим этилган маълумотга кўра, "Премьер" клубига 2005 йилда афсонавий хоккейчи Вячеслав Фетисов ташаббуси билан асос солинган. Бугунги кунда мазкур халқ жамоаси таркиби хоккейга меҳр қўйган, бир-бирини нафақат муз устида, балки майдон ташқарисида ҳам доимо қўллаб-қувватлайдиган инсонлардан иборат. Аввалига "Премьер" хоккей клуби ўз олдига спорт мусобақаларида иштирок этишни мақсад қилиб қўймаган эди. 

Шунга қарамасдан, 2010 йилга келиб жамоа ҳаваскор хоккей клублари ўртасида ўтказиладиган турнирларнинг доимий иштирокчисига айланди. 2015/2016 йилги мавсумда "Премьер" жамоаси Тунги хоккей лигаси фестивали бешинчи саралаш босқичи мунтазам чемпионати якунида энг юқори натижа кўрсатди. Плей-офф натижаларига кўра ҳам "Орзулар лигаси" (Иккинчи дивизион)нинг 18+ дивизионида 1-ўринни эгаллади.