Александр Поветкин допинг сабаб тўрт йилга дисквалификация қилинди

Бу ҳақда ташкилот матбуот хизмати хабар берди.

"Суриштирув натижасида 2014 йилда Поветкин томонидан топширилган намунада тақиқланган остарин моддаси аниқланди. Остарин – андроген рецепторларининг селектив модулятори бўлиб, у мушак массасини ошириш ва жисмоний имкониятларни кучайтириш учун спортчилар томонидан кенг қўлланилади.

Спортчи бу ҳолат ҳақида хабардор қилинганидан сўнг, шикоят қилмасликка қарор қилди. ITA 2024 йил 21 октябрдан 2028 йил 20 октябргача бўлган даврда Поветкинни тўрт йилга дисквалификация қилиш ҳақида қарор чиқарди", — дейилади ITA баёнотида.

Эслатиб ўтамиз, Поветкин профессионал боксдаги фаолиятини якунлаган. Унинг сўнгги жанги 2021 йил март ойида ўтказилган бўлиб, унда британлик Диллиан Уайтга техник нокаут билан ютқазган. Умумий ҳисобда Поветкин 36 та ғалаба (23 та нокаут), 3 мағлубият ва 1 дуранг қайд этган.