Алина Кабаева: Ҳакамлар исроиллик гимнастикачини мағлуб этишини хоҳлашмади

"Албатта, Токиода бўлиб ўтган Олимпия ўйинларида содир бўлган воқеа жаҳон бадиий гимнастикаси учун даҳшатли ҳолат. Дина Аверина аъло даражада иштирок этди, у тўрт дастурни ҳам аъло даражада бажарди, элементларни бехато ижро этди. Исроиллик рақиби каби ҳеч нарсани тушириб юбормади.

Дина Аверина охирги дастурини тасма билан тугатди ва хатосиз яхши бажарди. Аммо, унга баҳо бериш учун 6 дақиқа сарфланди. Гарчи ҳозирда агар сиз ҳамма нарсани хатосиз яхши бажарган бўлсангиз, бир-икки дақиқа кутишингиз мумкин, лекин 6 дақиқа эмас... Бу нима дегани? Ҳакамлар баҳоларни ҳисоблашган ва Аверина исроиллик гимнастикачини мағлуб этишини хоҳлашмаган.

Биласизми, кўплаб спорт турларини НАТО мамлакатларидан келган ҳакамлар баҳолайдилар ва у ерда бизнинг спортчилар ғалаба қозонишади. Шунинг учун, менимча, бу савол ноўрин.  Шунчаки, яхши ва унчалик яхши бўлмаган одамлар бор.

Ҳа, Ашрам яхши гимнастикачи, у яхши чиқиш қилди, лекин қўпол хатога ҳам йўл қўйди. Бу хато учун ундан бир очко олиб ташланиши керак эди, аммо 0,7 очко олиб ташланди. Бундай хато билан Олимпия ўйинларида ғалаба қозонилмайди", - дея Кабаеванинг сўзларини келтиради РИА Новости "Россия" 1 телеканалига таяниб.

Эслатиб ўтамиз, 1996 йилдан бери биринчи марта Россия бадиий гимнастика бўйича олтин медаль олмади. Бу россиялик Дина Аверина шанба куни кўпкурашнинг яккалик баҳсларида Исроил спортчиси Лина Ашрамга ютқазиб, кумуш медаль соҳибасига айлангандан кейин содир бўлди.