Алискеров Уиттакердан қабул қилиб олган мағлубиятига изоҳ берди

UFC on ABC 6 оқшомининг марказий жангида россиялик Икрам Алискеров австралиялик Роберт Уиттакерга қарши октагонга кўтарилиб, биринчи раунддаёқ нокаут билан мағлубиятга учраган эди. Қисқа муддатда Хамзат Чимаевнинг ўрнини эгаллаган Икрам номдор рақибига муносиб қаршилик кўрсата олмади. 

"Алҳамдулиллаҳ, менда ҳаммаси жойида. Нима бўлганини ҳамма кўрди. Мен ўзимни йўқотиб қўйганим йўқ. Бу спорт, ҳеч қандай ўзимни оқлашлар йўқ. Мен бу таваккалга ўзим онгли равишда бордим ва жангни қисқа муддатда қабул қилдим. Олдинга интилишида давом этаман. Иқлим мослашиш менда жуда қийин кечди. Кейин қисқа муддатда иккита вазн ташлаш жараёнини бошдан ўтказдим. Икки-уч ҳафта давомида спарринг жанглари ўтказмадим. Жангга 90 кг вазн билан чиқдим. Ўтган жангимда 96 кг эдим. Кўп сабаблар бўлди, лекин ўзимни бу билан оқламайман. Бир нарсани айтишим керак, жанг олдидан ўзимга бўлган ишонч жуда юқори эди. Ҳеч қачон кечагидек ўзимга ишонмаганман.", - деди Алискеров.