Алькараз беш сетда Синнерни мағлуб этиб, US Open 1/2 финалига чиқди

Жаҳоннинг 4-ракеткаси испаниялик Карлос Алькараз US Open чорак финалида АТР рейтингида 13-ўринни эгаллаб турган италиялик Янник Синнерни 6/3, 6/7(7), 6/7(0), 7/5, 6/3 ҳисобида мағлуб этди ва ярим финалга чиқди.  

Шу тариқа, Алькараз кетма-кет иккинчи, фаолиятидаги саккизинчи беш сетлик учрашувида ғалаба қозонди. Умуман олганда, бу унинг жорий мавсумдаги 58 ўйиндаги 49-ғалабаси бўлди. У бу кўрсаткич бўйича Тур етакчиси бўлиб турибди.

19 ёшли испаниялик теннисчи Рафаэль Надаль 2005 йилда "Ролан Гаррос"да ғалаба қозонганидан бери "Катта Дубулға"нинг энг ёш ярим финалчисига айланди. АҚШ Очиқ чемпионатида у Пит Сампрас (1990 йилда) чемпион бўлганидан бери энг ёш ярим финалчи ҳисобланади.

Рейтингда юқори ўринлар учун курашни давом эттираётган Алькараз энди мезбонлар вакили Фрэнсис Тиафо билан тўқнаш келади.