Алонсо "Астон Мартин" билан 1+1+1 кўринишида шартнома имзолади

Испаниянинг АS нашри ўз манбаларига таяниб, томонлар ўртасидаги музокаралар қандай кечганлиги ҳақида маълумот берди. 

Маълум қилинишича, Алонсо "Астон Мартин" билан 1+1+1 схемаси бўйича уч йиллик шартнома имзолаган. Шартномада ҳар мавсумдан кейин узайтириш ва муддатидан олдин тугатиш вариантлари кўзда тутилган. Бу вариантлардан фақат Алонсо фойдаланиши мумкин. Испаниялик пойгачининг "Астон Мартин"даги маоши эса бир мавсум учун 20 миллион долларни ташкил қилади.

Дастлаб "Астон Мартин" Себастьян Феттель билан шартномани узайтирмоқчи эди. Пойгачига яна бир йиллик янги шартнома таклиф қилинганди. Бироқ, Феттель отаси, рафиқаси ва фарзандлари билан бу мавзуни муҳокама қилиб, "Формула-1"дан кетишга қарор қилди ва бу қарорини оммага эълон қилди.

Натижада, Венгриядаги Гран-прининг дам олиш кунларида Алонсо ва "Астон Мартин" ўртасида фаол музокаралар бўлиб ўтди ва тезда келишувга эришилди.

Қайд этилишича, "Альпин" жамоаси Алонсога икки йиллик шартнома таклиф қилган ва бу шартнома шартлари аллақачон икки томон томонидан озми-кўпми келишиб олинган. Бироқ якунда Алонсо "Астон Мартин"нинг таклифини қабул қилди.