Андижонда “Workout” мусобақаси ғолиблари аниқланди

Ёшларнинг бўш вақтини мазмунли ташкил этиш, уларни жисмоний тарбия ва спортга кенг жалб қилиш мақсадида анъанавий тарзда ўтказиб келинаётган мазкур мусобақада мамлакатимизнинг 14 та ҳудудидан 42 нафар ёш иштирок этди.

18-30 ёш тоифасидаги йигитлар ўртасида ташкил этилган мусобақада иштирокчилар турник ва брусда тортилиш машқларини бажарди.  

Андижон шаҳридаги Экопаркда жойлашган воркоут майдонида ўтказилган мусобақалар юқори малакали ҳакамлар томонидан баҳолаб борилди. Машқларни белгиланган талаблар асосида сифат ва сон жиҳатдан устунликда бажарган иштирокчилар ғолибликни қўлга киритди.  

Якуний натижаларга кўра,  Қашқадарё вилоятидан Далер Бўриев биринчи, Сурхондарё вилоятидан Обиджон Холмўминов иккинчи, Қорақалпоғистон Республикасидан Жасур Ражаббоев учинчи ўринни эгаллади.  

Ғолиб ва совриндорлар ташкилотчилар томонидан медаль, диплом ҳамда эсдалик совғалари билан тақдирланди.  

Таъкидлаш жоиз,  мазкур мусобақада фахрли 1,2,3-ўринни эгаллаган ёшларнинг маҳаллаларида спорт майдончалари қуриб берилади.