Андижондан Мўйноққача пиёда бораётган йигитлар Жиззах вилоятида

“Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги Президент Фармонини кенг тарғиб этиш мақсадида сирдарёлик Элдорбек Жўраев ҳамда Тўлқин Усмонов шу йил 15 февралдан бошлаб Андижон вилоятидан Мўйноққача пиёда йўлга чиқишган эди.

Шу кунгача улар Андижон, Фарғона, Наманган, Тошкент вилоятлари, Тошкент шаҳри ҳамда Сирдарё вилоятини пиёда босиб ўтишган ҳолда бугун куннинг иккинчи ярмида Жиззах шаҳрига етиб бориши кутилмоқда.

Спортчи йигитларни Жиззах вилоят жисмоний тарбия ва спорт бошқармаси ходимлари ҳамда кенг жамоатчилик илиқ қарши олишди. Ҳаттоки йўлдан ўтиб кетаётган йўловчилар ҳам улар билан кўришиб, жасоратига юксак баҳо бериб, мақсади сари интилишларида омад тилаётгани диққатга сазовор.

Эътиборлиси, жойларда маҳаллий аҳоли вакиллари ҳамда ёшлар ҳам уларга қўшилишмоқда. Бундан кўриниб турибдики, юртдошларимиз бу ташаббускор йигитларга бефарқ эмаслар ва уларни ҳар томонлама қўллаб-қувватлашмоқда.