АҚШ марвариди Винус Уильямс 40 ёшга тўлди

Уильямсларнинг тўнғичи бугун 40 ёшга тўлди. Винус Эбони Старр Уильямс 1980 йил 17 июнь куни АҚШнинг Линвуд шаҳрида дунёга келган. Профессионал фаолиятини 1994 йилда бошлаган. 

Ўтган давр мобайнида 49 та WTA яккалик, 22 та жуфтлик турнирларида бош совринни қўлга киритди. Турнирлардаги иштирокидан 41,805,656 доллар ишлаб олди. 

Уильямс "Катта Дубулға" туркумига кирувчи 7 та яккалик турнирида ғолиб бўлди: Уимблдон 2000, 2001, 2005, 2007 ва 2008 йилларда, шунингдек, US Open 2000 ва 2001 йилларда. Australian Open-2003, "Ролан Гаррос"-2002 ҳамда Australian Open-2017 турнирларининг финалида ўйнади. Қизиғи, барча уч финалда синглиси Серена Уильямсга имкониятни бой берган.  

Винус 2002 йилнинг февраль ойида фаолиятида илк бор WTA рейтинги пешқадамига айланган. Дунёнинг биринчи ракеткаси сифатида 11 ҳафта карвонбошилик қилди. Америкалик теннисчи жуфтлик рейтингида ҳам пешқадамлик қилган. 

Винус Уильямс 1999 йилда АҚШ терма жамоаси таркибида Федерация Кубогида зафар қучган. 2000 йилги Сидней Олимпиадасининг яккалик баҳсларида олтин медални қўлга киритди. Айни пайтда Винус сайёрамизнинг 67-ракеткаси сифатида фаолиятини давом эттирмоқда. 

Бугунги кун қаҳрамони теннисдан бўш вақтларида караокеда қўшиқ куйлайди, расм чизади ва шеър ёзиб туради.