“Авесто”даги бадантарбия машғулотидан ФОТОГАЛЕРЕЯ

Ўзбекистон Республикаси Вазирлар Маҳкамасининг “Ўзбекистонда соғлом турмуш тарзини кенг тарғиб қилиш ва аҳолини жисмоний тарбия ва оммавий спортга жалб қилиш тўғрисида”ги қарорига асосан, юртимизда аҳолининг турли қатлами ўртасида соғлом турмуш тарзини кенг тарғиб қилиш тизимини йўлга қўйиш, бунинг баробарида, ёш авлодни ёт иллатлардан асраш, қолаверса, маҳаллалардан тортиб, таълим муассасалари, корхона ва ташкилотларда жисмоний тарбия ва спортни оммавийлигини оширишда дастуриламал вазифасини ўтамоқда. 

Диёримизда мазкур қарор ижросини тўлақонли таъминлаш мақсадида изчил изланишлар олиб борилаётир. Бинобарин, Ўзбекистон Жисмоний тарбия ва спорт вазирлиги ташаббуси билан “Спорт тарғиботини ўзимиздан бошладик, сиз ҳам сафимизга қўшилинг!” шиори остида йўлга қўйилган спорт тадбирлари юртимиз бўйлаб кенг қулоч ёймоқда. 

Жумладан, Урганч шаҳридаги “Авесто” боғ-мажмуасида ўзига хос югуриш ва бадантарбия машғулотлари ўтказилди. Унинг эътиборли томони шунда бўлдики, ушбу тадбирларда Хоразм вилояти Жисмоний тарбия ва спорт бошқармаси, бошқарма тизимидаги таълим муасссасалари, спорт мактабларининг раҳбарлари, масъул ходимлар ҳамда методистлар ҳамжиҳатликда иштирок этдилар. 

Табиийки, ўтказилган югуриш ва бадантарбия машқлари вилоят маркази аҳолиси, асосан, ёшларни бефарқ қолдирмади. Улар машғулотларни бевосита кузатиб, унинг инсон учун фойдали жиҳатларини кўнгилдан ҳис қилишди.  

- Турли касалликларнинг олдини олишда жисмоний тарбия ва спорт муҳим аҳамият касб этади, - дейди Хоразм вилояти Жисмоний тарбия ва спорт бошқармаси бошлиғи Шокир Мадаминов. - Айниқса, соғлиқни, саломатликни бир меъёрда сақлашда бадантарбия ва ҳаракатдан яхши восита бўлмаса керак. Ҳар куни белгиланган масофага югуриш, ўз вақтида бадантарбия билан шуғулланиш одамга фақат ва фақат наф келтиради. Шундай экан, ҳар бир киши бадантарбия машғулотини кундалик одатига айлантирмоғи зарур. Демак, “Спорт тарғиботини ўзимиздан бошладик, сиз ҳам сафимизга қўшилинг!”.

Икром ХУДОЙБЕРГАНОВ тайёрлади /Урганч/