Аёллар ўртасидаги блиц баҳсларида Афруза Ҳамдамова 8-тургача зўр ўйнади

Аёллар ўртасидаги жаҳон чемпионатида қатнашган ягона вакиламиз Афруза Ҳамдамова рапид баҳсларида шов-шувли натижа қайд этганди. Афруза бир неча жаҳон чемпионларини мағлубиятга учратиб, якунда чемпиондан бор йўғи ярим очко кам, кучли учликдан жой олган Жу Вен Жун (Хитой, 2536) ва Катерина Лагно (FIDE, 2433) билан эса бир хилда очко жамғариб, совринли ўринлардан четда қолганди. 

Ҳамдамова 11 та турдан иборат блиц баҳсларида ҳам ёмон қатнашмади. Айниқса, дастлабки 7 та турда мағлубиятга учрамади. У 1-турда айнан блиц бўйича икки карра жаҳон чемпиони қозоғистонлик Бибисара Ассаубаева билан учрашувда муқаррар мағлубиятдан чиқиб кетиб, дурангга имзо чекди. Кейин Дейс Корини мағлубиятга учратди. Россиялик жаҳон чемпиони Валентина Гунина ҳамда америкалик Алисе Ли билан дуранг ўйнади. Грузиялик Лела Жавахишвили ва хитойлик гроссмейстер Жон Йи Танни таслим эта олди. Еттинчи турда германиялик Динара Вагнер билан муросага келди. Охирги 4 та турда бироз чарчаб қолди чоғи, 3 та мағлубият қабул қилиб олди. Айнан шу мағлубиятлар унинг Топ-8`таликка киришига тўсқинлик қилди. 

Шунга қарамай, жаҳон чемпионатида қатнашган ягона вакиламиз рапид баҳсларидаги муваффақиятли иштироки боис, дунёнинг Топ-20`талик рейтингига кириб олишга эришди. АҚШ шарафини ҳимоя қилаётган ҳамюртимиз Гулруҳбегим Тоҳиржонова эса блиц жаҳон чемпионатида 99-ўрин билан кифояланди.