Бадантарбия – мустаҳкам саломатлик гарови!

Нукус шаҳридаги 1-болалар ва ўсмирлар спорт мактабининг спорт мажмуасига тонги соат 6.00 да келганимизда бир гуруҳ нуронийларнинг эрталабки бадантарбия билан шуғулланаётганининг гувоҳи бўлдик.

– Эрталабки бадантарбиянинг инсон саломатлигига фойдаси беқиёс, – дейди 79 ёшдаги алоқа соҳаси фаҳрийси Ҳокимниёз Ембергенов. – Чунки, инсон кун бўйи ўзини яхши ҳис қилиб юради, иштаҳаси яхшиланади, ҳар қандай касалликлардан холи бўлади. Шунинг учун ҳам бадантарбия билан шуғулланишни кундалик одатга айлантирганмиз. Ўзим 1994 йилдан буён мунтазам шуғулланиб келаман. Гуруҳимиз маданият, таълим, соғлиқни сақлаш, хизмат кўрсатиш ва бошқа турли соҳа вакилларидан ташкил топган.

– Оилавий келиб эрталабки бадантарбия билан мунтазам шуғулланамиз, – дейди Қорақалпоғистон Республикасига хизмат кўрсатган архитектор, Бердақ номидаги Қорақалпоқ давлат мукофоти совриндори Оринбой Тўрениязов. – Ёшларимиз ўртасида жисмоний тарбия ва спорт, шу жумладан, эрталабки бадантарбия билан шуғулланишни тарғиб қилишимиз керак. Бунда биз фахрийлар ёшларга ўрнак бўлишимиз керак. Бу аҳоли саломатлигини мустаҳкамлаш билан бир қаторда жиноятчиликнинг олдини олишга хизмат қилади. Чунки спорт билан мунтазам шуғулланган кишидан ёмонлик чиқмайди.

Эрталаб Нукус кўчалари бўйлаб юрар эканмиз, фахрийларнинг, ёшларнинг, хотин-қизларнинг бадантарбия билан шуғулланаётгани бизни қувонтирди. Ўзимиз ҳам бундан четда қолмасдан, ҳар куни шуғулланишни мақсад қилдик.