Баҳодир Жалолов бўлажак рақиби ҳақида гапирди

Баҳодир Жалолов (9-0, 9 КО) 18 март куни Дубайда польшалик Камил Cоколовски (11-25, 4КО)га қарши рингга кўтарилади. Жалолов рақиби ҳамда тайёргарлиги ҳақида Olamsport.com сайтига қисқа интервю берди.

"Cоколовскига қарши март ойида бўладиган жангимга тайёргарлик олиб боряпмиз. Рақибим жуда чидамли боксчи. Дэвид Прайс, Диллиан Уайт каби кучли ва таниқли боксчилар билан жанг қилган. Промоутер, менежерларим ҳамма рақибларини бир-икки раундда нокаут қилавермасин, деб шунақа чидамли рақибни беришди. 

Жанг 8 раунд бўлади, шунинг учун ҳам зарба кўтарадиган рақиб бўлиши керак эди. Катта жангларга чиққанимда кўпроқ раунд ишлашга ўрганишим лозим. Биринчи ўриндаги мақсадим - рейтингимни кўтариш. Камилнинг ҳам рекорди яхши, юқори рейтингли боксчиларга қарши рингга чиққанлар билан жанг қилса рейтингда кўтарилиш осон бўлади.

Айни пайтда машғулотларни Янгиобод спорт базасида олиб боряпмиз. Тез кунда хориждан спарринг шериклар келиши керак, улар келганидан сўнг 8 раундлик жангга тайёргаликни бошлаймиз", - деди Баҳодир.