Баҳодир Жалолов: «Олимпиада чемпиони мақомидан кейин кучлироқ рақиб билан жанг қилишни хоҳлайман»

Куни кеча пойтахтимиздаги муҳташам «Форумлар саройи»да имконияти чекланганлар куни муносабати билан «Биз турлимиз. Биз тенгмиз. Бир жамоа» шиори остида концерт дастури бўлиб ўтди. Тадбирда паралимпиячиларимиз, шунингдек бир қатор номдор спортчиларимиз ҳам иштирок этишди. Концерт якунида Olamsport.com сайти мухбири Токио Олимпиадаси чемпиони Баҳодир Жалолов билан флеш интервью ташкил қилди. Жалолов аввало, 11 декабрь куни бўладиган жанги тўғрисида гапирди:

«Насиб қилса, жангим 11 декабрь куни Дубайда бўлиб ўтади. Тайёргарликни аллақачон бошлаганмиз. Ҳозирча рақиб номаълум, бир нечта вариантларни кўриб чиқяпмиз, бир-икки кунда аниқ бўлади. Тўғрисини айтсам, рақибни мен танламaяпман, бу иш билан устозларим шуғулланишяпти. Мен ким бўлса ҳам яхши рақиб беринглар деб айтдим. Олимпиада чемпиони мақомидан кейин кучлироқ боксчи билан жанг қилишим керак. Ўзимнинг хоҳишим ҳам шу, негаки, тайёргарлик ҳам шунга яраша бўлмоқда. Промоутерларим бу жангни Дубайда ўтказиш қарорига келишди, насиб қилса, Ўзбекистонда яна рингга чиқамиз».

Боксчи концерт ҳақидаги таассуротлари билан ҳам ўртоқлашди:

«Бугунги концерт ажойиб руҳда бўлиб ўтди. Очиғини айтишим керак, кўзда ёш билан томоша қилдик, жуда чиройли тайёргарлик кўрилган экан. Ким бўлишимиздан қатъий назар ҳар биримиз инсонмиз. Соғломми, ёки имконияти чекланганми, барчамиз Аллоҳни бандасимиз. Шунинг учун кимнидир кўринишига ёки имкониятига қараб баҳо бермаслик лозим. Иложи борича, имконияти чекланган инсонлар билан ҳам дўст бўлиш керак. Бу тадбирни кўриб қалбимда яна бир бор шукроналикни ҳис қилдим. Кимнидир қўли йўқ, кимнидир оёғи, кимдир гапира олмайди. Бизни шундай қилиб яратгани учун Аллоҳга шукур қилишимиз даркор. Бундай концертларнинг фойдали жиҳатлари кўп. Негаки, ҳаётимизда озгина қийналса ношукурлик қиладиган одамларни кўрамиз. Шу каби тадбирлар тез-тез бўлиб турса, кўпчиликка ўрнак бўларди», - деди Жалолов.