Баҳодир Жалоловнинг азалий рақиби Ричард Торрес бу сафар боксчимиз билан проф боксда жанг қилиш ниятида!

Хабар берганимиздек, Баҳодир Жалолов аввалроқ, таниқли бокс промоутерлик компанияси TopRank мижозига айланган эди, қизиғи, Ричард Торрес ҳам айнан мазкур компания жангчиси ҳисобланади. Торрес бу ҳолатга муносабат билдирар экан, Жалолов билан яна жанг қилиш имконияти туғилганини таъкидлади:

"У TopRank компанияси билан шартнома қилганида, мен энди бизнинг кесишувчи йўлларимиз бор, деб ўйладим. Бизнинг жангларимиз анчадан бери муҳокама қилинмоқда. Бир кун келиб биз буни яна такрорлай оламиз. Энди албатта ўша кун бўлади.

Ҳар сафар у билан жанг қилганимда, янада яхшироқ ҳолатда бўлар эдим. Энди яна шундай имконият борлигидан ҳурсандман", - деди Ричард Торрес BoxingScene нашрига берган интервьюсида.

Қайд этиш жоиз, Баҳодир Жалолов ва Ричард Торрес ҳаваскор боксда икки бор тўқнаш келган ва ҳар икки жангда Баҳодир Жалоловнинг қўли баланд келган.

Маълумот учун, Ричард Торрес 12 август куни проф боксдаги олтинчи жангини ўтказади, унга ўша куни ҳамюрти Уилли Жейк Жуниор (11-3-2) рақиблик қилади. Баҳодир Жалолов эса 26 август куни АҚШда нигериялик Онориоде Эҳвариеме (20-2-0) билан жанг қилади.