Баҳодир Жалоловнинг собиқ рақиби проф боксдаги 10-жангини ўтказади

Америкалик 24 ёшли Торрес 18 май куни АҚШда ўзи сингари мағлубият нималигини билмай келаётган ватандоши Брэндон Мурга (14-0, 8 КО) қарши рингга кўтарилади. Бу Торрес учун проф фаолиятидаги 10-жанг бўлади. Ричард барча жангларини муддатидан аввал якунлаган.   

30 ёшли Мур ҳам ҳали мағлубият ва дуранг қайд этмаган. Ўн тўртта жангининг 8 тасида рақибларини нокаутга учратган. Иккала боксчи ҳам шу кунгача мағлубиятга учрамаган рақиблар билан жанг қилган.

Маълумот учун, Торрес-Мур жанги 18 май куни Top Rank промоутерлик компанияси томонидан Сан-Диего шаҳрида ташкил этилади. Оқшомнинг марказий жанги енгил вазн тоифасида вакант бўлиб турган WBO чемпионлик камари учун Эммануэл Наваррете ҳамда Денис Беринчик ўртасида кечади.

Қайд этиш жоиз, Баҳодир Жалолов ва Ричард Торрес ҳаваскор боксда икки бор тўқнаш келган ва ҳар икки жангда ҳамюртимизнинг қўли баланд келган. Токио-2020 Олимпиадаси финалида Жалолов Ричард Торресни очколар ҳисобига кўра мағлубиятга учратганди.