Баҳор фасли волейбол мусобақалари билан бошланади

Бугун Андижон шаҳрида волейбол бўйича олий лига аёллар жамоалари ўртасида XXVIII Ўзбекистон чемпионатининг 1-тур ўйинларига старт берилади. Мусобақа Андижон давлат тиббиёт институти спорт мажмуасида ўтказилади.

Жорий йилги Ўзбекистон чемпионати баҳсларида ҳам одатдаги жамоалар, яъни амалдаги чемпион Ўзбекистон давлат жисмоний тарбия ва спорт университетининг СКУФ, Нукус давлат педагогика институти, «Тўмарис» (Наманган), «Андижон», «Ишонч» (Фарғона) каби ўндан ортиқ жамоа қатнашиши кутилмоқда. Бу борадаги якуний саволларга эртага бўладиган мандат комиссияси орқали жавоб олинади.

Баҳорнинг илк шодиёнаси бўлмиш 8 март – Халқаро хотин-қизлар куни байрамининг эртасига Навоий шаҳрида эркаклар жамоалари ўртасида XIX Ўзбекистон чемпионатининг 1-тур баҳсларига старт берилади. Навоийдаги мусобақалар Олимпия захиралари коллежи спорт иншоотида ўтказилади. Дарвоқе, эркаклар ўртасидаги олий лига баҳсларида янги жамоалар иштирок этиши кутилмоқда.

Волейбол бўйича бу йилги Ўзбекистон чемпионати мусобақаларда Миллий гвардия ҳамда Мудофаа вазирлиги ҳам ўз жамоалари билан қатнашиш истагини билдиришган. Демак, бу йилги мусобақалар ҳар қачонгидан шиддатли кечишини тахмин қилиш қийин эмас.