Баҳрайн-2025: Ҳамюртларимиз кеча 10 та спорт турида беллашишди. Битта медаль қўлга киритилди

Кечаги кун доирасида ўзбекистонлик спортчилар бокс, муай-тай, аралаш жанг санъати турлари, таэквондо WТ, енгил атлетика, волейбол, футзал, гандбол, велоспорт ва от спорти турларида баҳс олиб боришди.

Осиё ёшлар ўйинларининг кечаги беллашувларида делегациямиз ҳисобига ягона медални Насима Мамирова тақдим этди. Енгил атлетиканинг 2000 метрга стипл-чез югуриш дастурида иштирок этган ҳамюртимиз марра чизиғини иккинчи бўлиб кесиб ўтди ва кумуш медалга сазовор бўлди.

Мусобақанинг бокс беллашувлари ҳам қизиқарли жангларга бой бўлмоқда. Ўзбекистон терма жамоасининг 4 аъзоси саралаш жангини ўтказган бўлса, улардан 3 нафари ишончли ғалабалар билан кейинги босқичга йўл олди.

III Осиё ёшлар ўйинлари доирасида велоспорт баҳсларига ҳам старт берилди. Ҳамюртларимиз аралаш жамоавий вақт пойгаси дастурида қатнашишди. 40 км масофага кечган мусобақада юртдошларимиз 47:31.18 дақиқа билан тўртинчи бўлишди.

Волейболчиларимиз саралаш беллашувларидан муваффақиятли ўта олишди. Мўғулистон билан баҳс олиб борган йигитларимиз 3:1 ҳисобида ғалаба қозониб, 1/8 финал йўлланмасига эга бўлдилар. Ушбу босқичда ҳамюртларимизга Индонезия рақиблик қилади.

Осиё ўйинлари доирасида гандбол ва футзал бўйича жамоаларимизнинг беллашувлари омадсиз якунланди. Гандболчи қизларимиз Хитойга 29:37, футзалчи йигитларимиз эса Афғонистонга 2:10 ҳисобида мағлуб бўлишди.

III Осиё ёшлар ўйинларида муай-тай бўйича беллашувлар қизғин давом этмоқда. Ушбу спорт турида 8 ҳамюртимиз баҳс олиб борган бўлса, улардан 5 нафари ғалаба қозонди.