Бангкокда нима гап? Боксчиларимизнинг машғулотлари, Таиланддаги ўзбек мухлислари ва қуръа

Мусобақа бошланишига жуда оз вақт қолгани сабаб терма жамоамиз аъзолари машғулотларни меҳмонхонанинг ўзида олиб боришмоқда. Бош мураббий муҳим жангларга оз вақт қолгани учун спортчиларга юкламани камайтирган. Йигит ва қизларимизда кайфият яхши. 

"Бу сафарги мусобақада ташкилий жиҳатлар ўзгача, авваллари суратчилар Осиё чемпионатига келмаганди биз билан", - дейишди йигитлар. 

Дарҳақиқат, бу сафарги қитъа биринчилиги аввалгиларидан яхшигина фарқ қилмоқда. Бу сафарги чемпионатда эркаклар ва аёллар ўртасидаги баҳслар бир вақтда ташкил этилмоқда. Бунгача эркаклар ўртасидаги Осиё чемпионати алоҳида, қизлар ўртасидаги мусобақа алоҳида мамлакатларда, бошқа-бошқа вақтда ўтказилган. Мураббий Лочин Қўчқоров бошчилигидаги қизларимиз ҳам Бангкокдан медаллар шодаси билан қайтишни мақсад қилишган. 

Машғулотлардан сўнг мусобақа олдидан фикрларни билиш учун боксчиларимизнинг хоналарига чиқдим. Баҳодир Жалолов ва Исроил Мадримов билан бироз суҳбатлашдик. Орада хонага қўнғироқ бўлди. Биринчи қаватда боксчиларимизни кўриш учун кимдир келганлигини айтишди. Бирга тушдик. Шу пайт қўлида Ўзбекистон байроқлари, қази, патир ва бошқа майда-чуда кўтарган Абдураҳмон Фозилов бошчилигидаги уч кишидан иборат мухлислар гуруҳи спортчиларимизни қарши олди. Ҳар ерда ҳозиру-нозир Абдураҳмон ака спортчиларимизни қўллаб-қувватлаш учун Таиланд пойтахтига етиб келган эканлар. 

"Бангкокка "қуролланган" ҳолда келдик. Насиб қилса залдан туриб ўзбек боксчиларимизни қўллаб-қувватлаб турамиз. Ўзбекча мухлисликни Осиё ринглари ҳам кўриб қўйсин. Имкон даражасида Таиланддаги ватандошларимизни тўплаяпмиз", - деди Абдураҳмон Фозилов. 

Кечка томон муҳим тадбирлардан бири - қуръа ташлаш маросими ташкил этилди. Унда Ўзбекистон бокс федерацияси мутасаддилари, терма жамоамиз мураббийлари ҳам иштирок этишди. 

Тадбир айнан боксчиларимиз истиқомат қилаётган меҳмонхонанинг ўзида бўлиб ўтди. Қуръа ташлаш автоматик тарзда, компьютер ёрдамида амалга оширилди. Яъни, спортчилар рейтингига қараб ажратилмади. Бу бир томондан қизиқ. Аммо, дастлабки босқичдаёқ кучли рақиблар ўзаро тўқнаш келадиган ҳолатлар ҳам кузатилди. Жумладан, -69 кг вазн тоифасидаги боксчимиз Бобоусмон Батуров дастлабки босқичдаёқ мўғулистонлик кучли рақибга қарши тўқнаш келадиган бўлди. Кейинги давраларда ҳам уни осон бўлмаган рақиблар кутиб турибди. Майли, хечқиси йўқ. Биз Бобоусмонга ишонамиз, рақибнинг ким бўлиши у қадар катта аҳамиятга эга эмас. У терма жамоамизнинг асосий "қурол"ларидан бири ҳисобланади. 

Бугундан жанглар старт олади. Ҳозирча ТВ трансляцияси Ўзбекистонда амалга оширилиши бўйича келишувга эришилмаган. Фақатгина, "УзРепорт" телеканали ярим финалдан бошлаб жангларни намойиш этишни режалаштирган. Унгача эса, мухлисларимиз интернет тармоғи орқали УШБУ ХАБАРда берилган ҳаволалар орқали жангларни томоша қилишлари мумкин. 

Демак, бугундан бошлаймиз! Янги рекордлар сари олға Ўзбекистон! Биз сизга ишонамиз!

Азиз Тўхтамуродов, Бангкок шаҳридан

БИРИНЧИ КУН

ИККИНЧИ КУН