“Баркамол авлод-2021”: Президент соврини учун умумий жадвалда қайси ҳудудлар етакчи?

Ортда қолган вақт давомида “Баркамол авлод-2021” спорт ўйинлари дастуридан ўрин олган 3 та спорт тури бўйича мусобақалар бўлиб ўтди.

Эслатиб ўтамиз, академик лицей ва профессионал таълим муассасалари ўқувчи-ёшлари ўртасида ўтказилаётган мусобақанинг республика финал босқичи биринчи мусобақаси дзюдо бўйича ташкил этилиб, унга Нукус шаҳри мезбонлик қилган эди.

Иккинчи мусобақа Жиззах шаҳрида енгил атлетика бўйича ташкил этилди ва учинчи мусобақа кураш бўйича Бухорода бўлиб ўтди.

Ҳаммамизга маълумки, 12 та спорт туридан ўтказилувчи “Баркамол авлод-2021” спорт ўйинларининг республика финал босқичи якунида 14 та ҳудуднинг ҳар бир мусобақа давомида тўплаган очколари ҳисобига кўра умумжамоа ҳисобида ғолибликни қўлга киритган ҳудуд аниқланади.

Ўтказилган 3 та мусобақадан сўнг, якуний жадвални бухоролик спортчилар 41 очко билан бошқариб туришибди. Сабаби улар кураш ва енгил атлетика бўйича ўтказилган мусобақаларда умумжамоа ҳисобида биринчи ўринни қўлга киритган эди. Шунингдек, дзюдо баҳсларида ҳам умумжамоа ҳисобида 4-ўринни қўлга киритган.

Жадвалнинг иккинчи ўринида 36 очко билан Хоразм вилояти вакиллари жой олган. Эътиборлиси, улар бирор марта ҳам мусобақани умумжамоа ҳисобида 1-ўринда якунламаган, лекин хоразмликлар ўтказилган 3 та мусобақада иккинчи, учинчи ва тўртинчи ўринларни эгаллаганликлари учун тўплаган очколари салмоқли кўринишга эга.

Жадвалнинг учинчи ўринида бир йўла икки ҳудуд жойлаштирилган. Қорақалпоғистон Республикаси ва Самарқанд вилояти спортчилари ҳозирча бир хил 33 очко жамғаришган.

“Баркамол авлод-2021” спорт ўйинларининг республика финал босқичи якунига қадар 9 та спорт тури бўйича 11 та мусобақа ўтказилади. Шу боисдан ушбу жадвалда ҳудудлар бир неча марта ўзаро ўрин алмашишлари мумкин.

Эслатиб ўтамиз, финал босқичи якунида жадвалнинг юқори учлигидан ўрин олган ҳудудларнинг спортчи-ёшларига Президент соврини топширилади.