“Баркамол авлод-2022”: Финал босқичидан ўрин олган икки мусобақа якунига етди

Сирдарё вилояти мезбонлик қилган ушбу мусобақаларда республикамизнинг 14 та ҳудудидан академик лицей ва профессионал таълим муассасалари ўқувчи-ёшлари республика чемпионлиги учун кураш олиб боришди.

Ўткир ақл соҳиблари ўртасидаги муросасиз беллашувларда 200 нафарга яқин ёшлар иштирок этишди ва финал баҳслари якунига кўра, шахмат бўйича ўтказилган мусобақада умумжамоа ҳисобида Тошкент шаҳри вакиллари 1-ўринни ўзлариники қилишди. Жиззахлик ёшлар 2-ўрин билан тақдирланишган бўлса, фахрли 3-ўрин Бухоро вилояти спортчиларига насиб этди.

Шашка бўйича ўтказилган мусобақаларда мезбон Сирдарё вилояти вакиллари энг кучли эканликларини намойиш этишди. Тошкент шаҳри терма жамоасига 2-ўрин насиб этган бўлса, самарқандлик ёшлар 3-ўрин билан тақдирланишди.

Маълумот учун, “Баркамол авлод” спорт ўйинларининг республика финал босқичи доирасида энг сўнгги мусобақа стол тенниси бўйича ўтказилади.