«Баркамол авлод-2022» – якуний чемпионлик йўлида энг кучлилар сараланмоқда

Республикамиздаги академик лицей ва профессионал таълим муассасалари ўқувчи-ёшлари ўртасидаги мусобақаларда кураш, футбол, дзюдо, енгил атлетика, волейбол (қизлар алоҳида, ўғил болалар алоҳида), баскетбол (қизлар алоҳида, ўғил болалар алоҳида), гандбол (қизлар алоҳида, ўғил болалар алоҳида) спорт турлари бўйича якуний чемпионлар номи аллақачон маълум бўлиб улгурди.

Маълумки, 12 та спорт туридан ўтказилувчи ушу спорт ўйинлари якунида 14 та ҳудуднинг тўплаган очколари ҳисобига кўра умумжамоа ҳисобида ғолибликни қўлга киритган ҳудуд аниқланади.

9 та мусобақадан сўнг жадвалнинг энг юқори поғонасини самарқандлик спортчилар 107 очко билан бошқармоқда. 2-ўринни Хоразм вилояти спортчилари 103 очко билан банд этиб турган бўлса, фарғоналиклар 96 очко билан 3-ўринда боришмоқда.

Шунингдек, юқори учликка кириш учун Сурхондарё вилояти терма жамоаси 92 очко билан, Қорақалпоғистон Республикаси ва Жиззах вилояти спортчилари эса бир хил 90 очкодан жамғарган ҳолда яхши имкониятга эга бўлиб туришибди.

Маълумот учун, «Баркамол авлод» спорт ўйинларининг республика финал босқичи доирасида яна бадминтон, белбоғли кураш, стол тенниси, шахмат ва шашка спорт турлари бўйича жами 5 та мусобақа ўтказилади. Шу боисдан ушбу жадвалда ҳудудлар бир неча марта ўзаро ўрин алмашишлари мумкин.

Эслатиб ўтамиз, финал босқичи якунида жадвалнинг юқори учлигидан ўрин олган ҳудудларнинг спортчи-ёшларига Президент совринлари топширилади.